موقع بلدتي
إلياس الرحباني … ثالث الأخوين
مِتْلِ الكأنُّو الريحْ يا اللي أخْذِتُنْ
ما أخْذِتُنْ
متلِ الكأنَّا صواتْهُنْ
بعْدا موسيقى ناعمة
بقلوبْ يا اللي حبِّتُنْ
راحو عَ غفلةْ
متلْ غيمةْ
لاعبتها الشمسْ
متلِ العشقْ بالهمسْ
وتركوا وراهُنْ بالدنِي مِيِّةْ صدى
مِيَّاتْ من مية صدى
وتركوا وراهُنْ هالمدى
مفتوحْ عَ وسع المدى
ونِصرُخْ ونصرخْ
يا عمرْ
وين اللي راحوا وينْهُنْ
ما في حدا
غيرِ الصدى
مْعَمْشَقْ على دراجِ الغناني
الساكنةْ بعيونْهُنْ
معمشق بطيْبِ قلوبهن
معمشق ببسمةْ حانية
زرعِتْ أملْ عَ دروبْهُنْ
مِشْيُوا ورا أحلامْهُنْ بَكِّيْرْ
عَ دغْشةْ هيكْ عمْ يسَرْبُوا
من قَبلْ الِعْصافيرْ
وتركوا على بوابِ اللِّنا
أوطانْ من أحلامْ
مرسومة على كفِّ الهوى
أوطانْ ما بتشبهْ حدا
أوطانْ بعدا معلَّقَة
متلِ الوَهِمْ
متلِ الكأنَّا شي سَهَمْ
طارْ وما هدَّا عالأرضْ
وطافْ الدني طولُ وعرضْ
وبعدو الحِلِمْ مزروعْ
جُوَّاتِ القلبْ
متلِ الأرِزْ
متلِ العرِسْ
متلِ الفرحْ
متلِ الأملْ بالبالْ
بعدو ما انْجَرَحْ
متلِ الحقلْ
يا اللي بيعرفْ كيفْ ربَّى عيلتو
وكيفِ السنابلِ حاملةْ غلِّةْ قمحْ
وهيِّ اللي وَحْدا
بتشرحِ الما بِيِنْشَرَحْ
أحلامهُنْ بقيتْ عنيدةْ
تُنْصُبْ مْراجِيحْ
تَيْسافروا عَ كتافْها
ولَيْداتْ من عمرِ الفرحْ والريحْ
عَ بلادْ خلفِ بلاد خلفْ بلادْ
تَ يُقْطفوا من بحرْها أعيادْ
يا ما إِجِتْهُنْ عالسَّكِتْ
من غير ما يحِسُّوا
متلْ شي لِصّْ جايي عالهدا شاطرْ
صارلُو سِنِةْ ناطِرْ
تَ يِسْرُقْ عمرْهُنْ سرقةْ
وياخذْ معو زُوَّادةِ الإيامْ
وتيابْهُنْ الِجْدادْ
أحلامهنْ بقيِتْ قويةْ
وصامدِةْ بوِجِّ الزَّمَنْ
أحلامْ كأنَّا وطنْ
غيرِ الوطنْ
وهيكِ الحكايةْ بعدها
متلِ الكأنَّا باقيةْ
ما بتقتلا الإِيامْ
ويمكنْ بتُوْقَعْ إِيْدْ يا اللي كَتْبِتا
بسِّ الوطنْ بالحلِمْ ما بيُوْقَعْ
وما بتخلصِ الأحلامْ
**
كتب الشاعر الكبير طلال حيدر ذات مرة:
في ناس قالوا غرق
في ناس قالوا مات
وفي ناس قالوا فتح
عتمة خيالو وفات
الياس الرحباني
فتح عتمة خيالو وفات
علي عجمي